Започнува Божикниот Пост. Време на воздржување, покајание и поправање на нашиот живот. Во секоја Црква им се кажува на Православните верници дека постот започнува и како добри Христијани треба да се придржуваме кон него од почетокот па се до крајот. Сепак, во мнозинството наши Македонски Цркви народот е збунет. Од една страна им се соопштува за Постот, а од друга, пак, добиваат покани од име на Црквата за посетување на забави кои Таа (Црквата) ги организира и тоа веднаш на почетокот на самиот Пост (во Сабота, за “Thanksgiving”) и баш пред самиот крај на Постот (за граѓанска Нова Година). На оваа тема е многу зборувано, но сеуште  вистината не може да пробие на површина. Сепак, ова не треба да биде причина за обесхрабрување. Ако искрено се “љубиме еден со друг“ како што Бог не поучува, тогаш ќе се трудиме и да се поправаме едни други онаму каде што грешиме и заеднички достојно да Му служиме на Господа. Посебно пак кога се работи за Црквата – тука не смеат да се дозволат никакви отстапувања. Да не Го жалостиме Бога, да не го навлекуваме Неговиот праведен гнев и строг суд и казна врз нас заради ваквите наши гревови. Да бидеме внимателни и да не ја спроведуваме на дело параболата за Лозарите. Зашто, како што слугите биле праќани при нив од Господарот на лозјето, така и меѓу нас постојат некои кои постојано укажуваат на тоа дека не треба да се организираат игранки во име на Црквата за време на пости. Но, како и слугите, наместо да бидат послушани, тие биваат или игнорирани, или обвинувани, или, како со камења со навреди опсипувани. Но, еве, ако не ги слушаме нив, тогаш барем „да се засрамиме од Сина Му“ на нашиот Господ Седржител. Не како лозарите во параболата да Го убиваме повторно, зашто речено е од светите оци: „Кој не пости во среда и петок, повторно Го распнува Господа“. Да внимаваме, некои меѓу нас ги повикуваат луѓето (и тоа од име на Црквата и баш во Црквата) да не постат за време на Божикниот пост и токму во петок – ете овој пат граѓанска Нова година паѓа во четврток наспроти петок). Зарем ќе бидеме како книжниците и фарисеите ние што се претставуваме како добри православни Христијани? Ние кои читајќи го Светото Евангелие и самите ги осудуваме тие фарисеи и книжници што ни Го распнале Господа? Но, ајде да се покажеме како вистински синови Божји и да сториме се што е во нашите можности и да го прекинеме организирањето на вакви прослави во нашите Цркви за време на пости. Во спротивно, Господарот „ќе го одземе од нас Своето лозје и ќе го предаде на други лозари“, а и заслужената казна одредена за лошите лозари нема да не одбегне. Но, нека не биде така: да размислиме добро, да и дозволиме на вистината да да пробие до нас и да се удостоиме како Закхеј, со чисти срца и покајание за поранешните дела, да Го примиме Господа во нашиот очистен и уреден дом – светата и непорочна наша Црква, па да допрат и до нас Неговите топли зборови: „Денеска дојде спасението за овој дом“.                       

   сХ.  

---

*Текстовите кои ги објавуваме во рубриката Inbox се испратени до редакцијата од наши читатели. Текстовите  претрпуваат минимални лекторски и граматички корекции, но во основа се непроменети.  Содржината и темите на добиените текстови на никаков начин не се под влијание на  Редакцијата на АКМПЕ. Објавените текстови не секогаш ги изразуваат ставовите на Редакцијата но од друга страна секогаш го изразуваат нашето длабоко уверување дека нивното објавување ќе поттикне размислување на соодветната тема.

Коментари

Додади ново Пребарај

3.20 Copyright (C) 2007 Alain Georgette / Copyright (C) 2006 Frantisek Hliva. All rights reserved."